माओवादी-मसाल एकीकरण थौं
नेकपा (माओवादी) व नेकपा एकता केन्द्र (मसाल)या दथुइ एकीकरणया निंतिं थौं निगुलिं दलया केन्द्रीय दुजःपिं दुथ्याःगु विस्तारित केन्द्रीय बैठक यलया अशोक पार्टी प्यालेसय् च्वनेत्यंगु दु ।
विस्तारिक बैठकय् निगुलिं केन्द्रीय समितिइ च्वनीपिं दुजःतय् बारे नं सहलह याइगु खँ धाःगु दु । थौं एकीकरण प्रकि्रयाय् सहमति जुल धाःसा कन्हय् निगुलिं पार्टी एकीकरण जूगु घोषणा जुइगु खँ माओवादीया प्रवक्ता दिनानाथ शर्मा थौं सुथय् 'सन्ध्या टाइम्स' लिसें खँ ल्हासें कनादीगु दु । वय्कःया कथं निगुलिं पार्टी एकीकरण लिपा केन्द्रीय समितिया ल्याः ११५ निसें १५० तक थ्यनेफुगु खँ नं वय्कलं
कनादीगु दु ।
बैठकय् थौं हे केन्द्रीय कमिटीया दुजःतय् पद बाँडफाँड याइगु जानकारी नं वय्कलं बियादीगु दु ।
थौं च्वनीगु विस्तारित बैठकं माओवादीं नाला वयाच्वंगु प्रचण्डपथयात चीकीगु खँ माओवादी स्रोतं धाःगु दु ।
अथे हे पार्टीया नां नं आः 'एकिकृत नेकपा माओवादी' तयेगु बारे निगुलिं दलया दथुइ न्हापा हे सहमति जुइधुंकूगु दु ।
माओवादीं थ्वयां लिपा आः मेगु चीधंगु वाम पार्टीत लिसें नं एकीकरणया निंतिं सहलह ब्याकीगु जानकारी
नं नेता शर्मा बियादिल ।
