प्रम नेपालयात भूटान भ्रमणया ब्वनापौ
येँ (सन्ध्या टाइम्स)/प्रधानमन्त्री माधवकुमार नेपालं भूटानया शरणार्थीत थःगु देशय् लित यंकेत तत्काल हे कुतः यायेत भूटानी सरकारयात इनाप यानादीगु दु । ताः ई न्ह्यःनिसें हे भूटानी शरणार्थीत नेपाःया झापाया थीथी शिविरय् च्वनाच्वंगु दु। भूटानी शरणार्थीत भारत जुयाः स्वंगूगु देय् नेपालय् वयाच्वंगु खः ।
थःगु हे निवास बालुवाटारय् थौं सुथय् भूटानया अर्थमन्त्री लिम्पो खान्दु वाङचुकयात नापलासें प्रम नेपालं उगु इनाप यानादीगु खः। प्रधानमन्त्रीया प्रेस सल्लाहकार विष्णु रिजालं कनादी कथं थौंकन्हय् भूटानी शरणार्थीतय्त स्वंगूगु देश अमेरिका व युरोपय् पुनःस्थापना याये यंकूसां नं शरणार्थी समस्या धाःसा समाधान मजूगु खँ न्ह्यथँसें प्रम नेपालं शरणार्थीतय्त उमिगु स्वदेश लित यंकेगु हे बांलाःगु लँपु जुइ धयादीगु खः। स्वंगूगु देशय् वनाच्वंपिं भूटानी शरणार्थीतय्सं आत्महत्या तकं याना हःगुलिं नेपाःया निंतिं शरणार्थी समस्या झन झन जटिल जुया वनाच्वंगु खँ नं प्रधानमन्त्रीं न्ह्यथनादीगु खः। लिसलय् भूटानी अर्थमन्त्री वाङचुकं नेपाः सरकारया चिउताःयात थम्हं भूटानया प्रधानमन्त्रीया न्ह्यःने तया बीगु बचं बियादीगु खः ।
भूटानी अर्थमन्त्री वाङ्चुक प्रधानमन्त्री नेपालयात आः भूटानय् जुइगु सार्क शिखर सम्मेलनय् ब्वति कायेत ब्वनापौ बीगु निंतिं वालुवाटार वंगु खः। भूटानया राजधानी थिम्पुइ अप्रिल २८ निसें २९ तक दक्षिण एसियाली क्षेत्रीय सहयोग संगठन सार्कया झिंखुक्वःगु शिखर सम्मेलन जुइत्यंगु दु ।
उगु सम्मेलनय् ब्वति कायेत भूटानया प्रधानमन्त्रीं छ्वयाहःगु ब्वनापौ अर्थमन्त्री नेपाःया प्रधानमन्त्री नेपालयात लःल्हानादीगु खः। उगु सार्क सम्मेलनया मू कार्यसूची जलवायु परिवर्तन जुइगु खँ धाःगु दु। सार्कया थ्व शिखर सम्मेलन न्हापांखुसी भूटानय् जुइत्यंगु खः। माल्दिभ्सं सम्मेलन याये मफइगु धायेवं भूटानं पाःब्व लःल्हाना काःगु दु ।
