फागुन ४ गतेनिसें पाइलट हडताल
येँ (सन्ध्या टाइम्स)/सेवा सुविधा अप्वयेकेमाःगु माग यासें नेपाल वायुसेवा निगमया पाइलटतय्सं फागुन ४ गतेनिसें हवाइ जहाज चले यायेगु ज्या हे ठप्प याइगु जूगु दु।
आन्तरिक उडान याइगु निजी क्षेत्रया मेमेगु वायुसेवा कम्पनीया पाइलटतय्गु तुलनाय् थःपिंसं म्हो जक सेवा सुविधा काये खनाच्वंगु दु धइगु निगमया पाइलटतय्गु गुनासो दु ।
निगमया पाइलटतय्गु संगठन नेपाल एयरलाइन्स पाइलट्स एसोसिएसनया नायः क्याप्टेन वाइके भट्टराईया धापू कथं पाइलटया माग पूरा यायेगु निंतिं वइगु फागुन ३ गते तकया अल्टिमेटम दु ।
माग पूरा मजुल धाःसा फागुन ४ गतेनिसें फुक्क उडान बन्द यायेगु ज्याझ्वः दयेकागु जानकारी वय्कलं बियादीगु दु। व्यवस्थापन पक्षं दछि न्ह्यवंनिसें हे माग पूरा यायेगु धया वयाच्वंगु जूसां आः तक नं माग पूरा मयाःगु कारणं आन्दोलनय् कुहां वयेमाःगु एसोसिएसनया धापू दु ।
