नेपाः पार्टीया रणनीति क्वःछीगु मुँज्या
येँ (सन्ध्या टाइम्स)/नेपाः राष्ट्रिय पार्टीं आः थःपिनि भावी राजनीतिक लक्ष्य कथं समृद्ध नेवाः राज्य गठन यायेगु, हाल प्रस्तावित नेवाः प्रदेशया सीमा तकू यायेत पहल यायेगु व संविधान निर्माण लिपा राज्य सत्ता कब्जा तकया ताः तयाः न्ह्याः वनेगु धकाः क्वःछिउगु दु ।
पार्टीपाखें आः दयेकीगु कार्यनीति थ्वहे लक्ष्य केन्द्रित यायेगु निर्णय नं पार्टीं याःगु दु ।
पार्टीया भावी दिशा व रणनीति तय यायेत नकतिनि च्वंगु छगू वृहत् मुँज्यां पुचः सहलह यानाःलि थ्व नीति क्वःछिउगु खः। नगरकोटय् आइतवाः न्हिछि जूगु उगु मुँज्याय् खुगू पुचः दयेकाः सहलह यासें थ्व लिच्वः पिकाःगु खः।
उगु ज्याझ्वलय् संविधानसभाया चुनावय् मात्र नेवाःतय्गु जक भोट कयाः छम्ह जक जूसां नेवाः सभासद त्याका छ्वयेफुगु, संविधान निर्माणया झ्वलय् संविधानसभाया थीथी समितिइ जातीय रुपं हे नेवाःतय्गु खँ न्ह्यथने फुगु व देय्या प्रमुख राजनीतिक मुद्दाय् थःपिं नं प्रत्यक्ष सहभागी जुइ दुगुयात प्रमुख उपलब्धी कथं काःगु खः ।
लिसें पार्टीया संगठन विस्तार याये मफुगु, पार्टीया लाइन प्रचार याये मफुगुयात थःपिनि कमजोर पक्षया रुपय् काःगु खः ।
सक्व, गोलढुंगा आदि लागाय् धाःसा पार्टीया छबी व संगठन क्वातुया वनाच्वंगु जानकारी स्थानीय कार्यकर्तातय्सं बिउगु खः ।
