'निषेधया राजनीति त्व:ता: सहमतिइ झासं'
प्रधानमन्त्री माधवकुमार नेपालं निषेधया राजनीति त्व:ता: सहमति व सहकार्यलिसे न्ह्यने न्ह्यायेत एकीकृत नेकपा (माओवादी)यात इनाप यानादीगु दु । वय्कलं ध्वंसया राजनीतिं सुयात नं फाईदा मजुइगु धयादिल ।
बुधवा: बाँकेया कम्दीस्थित राप्ती पुलया उलेज्या यानादिसें प्रधानमन्त्री नेपालं विकासया पूर्वाधार बिना देय्या विकास जुइमफइगु तथ्ययात थम्हं बांलाक थूगुलिं सतक व पुल निर्माणयात न्हापांगु प्राथमिकताय् लाकागु धयादिल ।
ज्याझ्वलय् उपप्रधान एवम् भौतिक योजना तथा निर्माणमन्त्री विजयकुमार गच्छदारं वर्तमान सरकार छु नं हालतय् क्वमदलीगु धयादिल । सरकार क्वथलेत माओवादीं गलत शैली छ्यसाः नं व सम्भव मदुगुलिं आः सहमति व सहकार्य मा:गु दावी यानादिल ।
सदरमुकाम नेपालगञ्जलिसे प्रत्यक्ष सम्पर्कपाखें वञ्चित जुयावयाच्वंगु कट्कुइया लक्ष्मणपुर, नरैनापुर, गंगापु, मटेहिया फत्तेहपुर, विनौंना व वैजापुर गाविसया वासिन्दात पुल निर्माण जुइधुंकाः लाभान्वित जुगु दु ।
नेपालगञ्ज-बघौडा सतकखण्ड अन्तर्गत राप्ती खुसि दथुइ करिव नीगू करोड तकाया लगानीइ निर्माण या:गु पुल स्वसः व पीनिगू मिटर ताःहाकः जू ।
