'संविधानसभायात ज्या यायेगु प्रमुख केन्द्र तायेकादिसं'
संविधानसभाया नाय सुवास नेम्वाङं संविधानसभायात ज्या यायेगु प्रमुख केन्द्र तायेका न्ह्यने वनेत राजनीतिक दलया नेतातय्त इनाप यानादीगु दु ।
बुधवा: सुथय् इलामय् स्थानीय संचारकर्मीतलिसे खँल्हानादिसें सभाध्यक्ष नेम्वाङं संविधान निर्माणया निंतिं ई चिहाक जुयावंगुलिं मेगु ज्यायायत स्वयां संविधान निर्माणय् ध्यान केन्द्रित यायेत नेतातय्त सुझाव बियादिल । संविधान निर्माणया महत्वपूर्ण ज्यायात केन्द्रय् तयेमा:गु राजनीतिक दलत आन्तरिक व दलगत विवादय् लागुलिं सभाध्यक्ष नेम्वाङं दुःख प्वंकादिल ।
वय्कलं जेठ १४ गते संविधान जारी जुइकथं संविधानसभां ज्या याःसां नं आपालं समितिया मस्यौदाय् विवाद जूगु व राजनीतिक विवादयात क्वचायेके मफुगुलिं समस्या वयाच्वंगु जानकारी बियादिल । संविधानसभां न्हापाया निर्धारित ई स्वया प्यलालिपा जक ज्या यायेखंगु व आः विवादया बुँदा मिलय् यायेत राजनीतिक दल अग्रसर खनेमदुगुलिं समस्या खनेदुगु खँ नेम्वाङं धयादिल ।
