हत्याया ल्यूने राजनैतिक कारण : बादल

एकीकृत नेकपा (माओवादी)या महासचिव रामबहादुर थापा 'बादलं' साचार उद्यमी जमिम शाहया हत्याया ल्यूने राजनैतिक कारण दुगु खँ धयादीगु दु ।

चितवनय् थौं जूगु छगू ज्याझ्वलय् न्वंवानादिसें बादलं पिने स्वयेबलय् शाहया हत्या प्राबिधिक कारण थें च्वंसां नं थुकिइ तःधंगु राजनैतिक शक्तिया ल्हा: दुगु दावी यानादिल । हत्या ल्युने छु राजनीतिक शक्तिया ल्हा: दु धइगुबारे धा:सा वय्कलं प्रस्त यानामदी । संक्रमणकालया गलत फाईदा कया प्रतिक्रियावादी शक्तितय्सं नागरिकया ध्यान मेखे हे छ्वयेत संचार जगतयात छ्यलेत स्वगु प्रसङ्ग न्ह्यथसें वय्कलं उकिप्रति सचेत जुइत फुक्कसित इनाप यानादिल ।