संयन्त्रय् प्रधानमन्त्री नं च्वनेमाः : कोइराला
उपप्रधान नापं परराष्ट्रमन्त्री सुजाता कोइरालां उच्चस्तरीय राजनीतिक संयन्त्रं सरकार संचालन यायेगु निंतिं ग्वाहालि याइगुलिं थुकी प्रधानमन्त्री आमन्त्रित दुजः कथं च्वने हे माःगु खँ धयादीगु दु ।
बुधवाः विराटनगर विमानस्थलय् संचारकर्मीत नाप खँल्हाबंला यानादिसें मन्त्री कोइरालां संयन्त्र सरकार क्वथलेगु व न्हूगु सरकार गठन यायेगु निंतिं मजूगु स्पष्ट यानादिसें संयन्त्र सरकार संचालनया निंतिं गठन जूगु धयादिल । वयेकलं प्रधानमन्त्री नं संयन्त्रय् च्वंसाः सरकार अझ बल्लाइगु व सरकारयात थप बल बीत नं प्रधानमन्त्री संयन्त्रया दुजः कथं च्वनेमाःगु धयादिल ।
अथेहे वयेकलं माओवादी लडाकुया व्यवस्थापन, शान्ति प्रकृयायात निष्कर्षय् थ्यंकेत व न्हूगु संविधान च्वयेगु ज्याय् ग्वाहालि यायेत गठन जूगु संयन्त्रय् प्रधानमन्त्री च्वंसा: सरकार निंतिं फलदायी जुइगु टिप्पणी यानादिल ।
कांग्रेसया मोरङं शाखाः यायेत्यंगु थीथी ज्याझ्वलय् ब्वति कायेत थः गृहनगर थ्यंकादिम्ह कोइरालां थःम्हं सरकारय् च्वनाः याःगु एकलौटी निर्णयया जक विरोध यानाःगु धयादिसें सरकारया विरोध मयानाःगु धयादिल । वयेकलं सरकारया नेतृत्वय् च्वनाः पार्टीयात जक मस्वसें दक्वसितं दुथ्याकाः न्ह्याः वनेमाःगु धयादिल ।
