हत्याया बारे सरकार गम्भीर : संचारमन्त्री

सूचना व संचारमन्त्री शंकर पोखरेलं संचार उद्यमी जमिम शाहया हत्याकाण्डयात सरकारं गम्भीर रुपं काःगु खँ धयादीगु दु । वयेकलं विशेष सुरक्षा व्यवस्था यानातःगु थासय् नं उद्यमी शाहया हत्या जूगुयात सरकारं गम्भीर रुपं काःगु धयादिल ।

सूचना व संचार मन्त्रालय व सामुदायिक रेडियो प्रसारक संघ नेपालं बुधवाः येँ याःगु अन्तरक्रिया ज्याझ्वः लिपाः संचारकर्मीत नाप खँल्हाबंला यानादिसें वयेकलं शाहया हत्या छानबिन उच्चस्तरीय आयोगं यानाच्वंगु व सत्यतथ्य पत्ता लगे जुइवं दक्वं खँ सार्वजनिक यायेगु कनादिल ।

अथेहे वयेकलं गृहमन्त्री नापं दक्वं सुरक्षा निकायया प्रमुखत विदेश भ्रमणय् वनेगु खँयात सरकारं पुनः बिचाः यायेमाःगु धयादिसें शाहया हत्याया इलय् गृहमन्त्री नापं दक्वं सुरक्षा प्रमुखत देय् पिने जूगुलिं समस्या वःगु धयादिल ।