झिंप्यंगू प्रदेशया निंतिं भूमिका म्हितूपिंत हन

येँ (सन्ध्या टाइम्स)/ संविधानसभाया राज्य पुनर्संरचना नापं राज्य शक्ति बाँडफाँड समितिपाखें हःगु झिंप्यंगू प्रदेशया अवधारणायात स्वीकार यायेगु जुइ मखु धकाः थीथी जातीय खलः पुचः नापं राजनीतिक दलया नेतातय्सं विरोध यायेगु नापं संघर्ष तकं यानाः हयाच्वंगु इलय् वहे प्रस्ताव दयेकेगुली महत्वपूर्णगु भूमिका म्हितूगु धकाः निम्ह सभासदपिंत हनेज्या तकं याःगु दु। संघीय गणतन्त्र नेपाः दुने आवंलि नेवाः स्वायत्त प्रदेश नापं थीथी जाति, भाषा नापं क्षेत्रया आधारय् झिंप्यंगू प्रदेश दयेकेत तयार याःगु प्रस्तावया निंतिं महत्वपूर्णगु भूमिका म्हितादीपिं निम्ह नेवाः सभासदपिंत नेवाः राष्ट्रिय मुक्ति मोर्चा नेपाःया येँ जिल्लापाखें तःजिक हनेज्या याःगु दु। संविधानसभाया राज्य पुनर्संरचना नापं राज्य शक्ति बाँडफाँट समितिपाखें अथे झिंप्यंगू प्रदेशया अवधारणा तयार यायेत उगु हे समितिया दुजः नापं एनेकपा (माओवादी)या नेता हितमान शाक्य व एमालेया नेता डा. मंगलसिद्धि मानन्धरयात वंगु शनिवाः हनेज्या याःगु खः। उगु ज्याझ्वलय् एमालेया नेता नापं सभासद डा. मानन्धरं आःया अवस्थाय् थःपिंसं तयार यानागु झिंप्यंगू प्रदेशया अवधारणायात स्वीकार याये मखु धकाः विरोध याइपिं धइगु विवादयात समाधान यायेगुपाखे मखुसें संघीय राज्यया अवधारणायात हे नकारात्मक रुपं यंकेगु सोच तयाः न्ह्याः वनीपिं खः धाःसां छुं पाइ मखु धयादिल। नेवाः राष्ट्रिय मुक्ति मोर्चा येँ जिल्लाया नायः उमेश स्थापितया सभापतित्वय् जूगु उगु ज्याझ्वलय् नेवाः स्वायत्त गणराज्य व राष्ट्रिय स्वाधिनताया संघर्ष विषययात कयाः अन्तर्क्रिया ज्याझ्वः नं जूगु खः। ज्याझ्वलय् नेतापिं हितमान शाक्य, डा. मंगलसिद्धि मानन्धर, दिलीप महर्जन नापं नेवाः ख्यःया न्ह्यलुवाःपिं डा. महेशमान श्रेष्ठ, विपेन्द्र महर्जन व सुजिव बज्राचार्यपिंसं न्ववानादीगु खः।