हेटौंडाय् राष्ट्रिय ज्ञानमाला
येँ (सन्ध्या टाइम्स)/ नेपाल राष्ट्रिय ज्ञानमाला समितिया साधारणसभा आः नकतिनि हेटौंडाय् जुल। समितिया नायः प्रा. सुवर्ण शाक्यया सभापतित्वय् जूगु ज्याझ्वलय् मूपाहां कथं सल्लाहकार नापं हेटौंडाया समाजसेवी महारत्न वज्राचार्यं ब्वति कयादीगु खः ।
सल्लाहकार प्रमुख शान्तरत्न शाक्यं लसकुस यासें न्ह्याःगु उगु ज्याझ्वलय् महासचिव अमीरमान शाक्यं बार्षिक प्रतिवेदन व दांभरि शान्त कुमार चित्रकारं आर्थिक प्रतिवेदन न्ह्यब्वयादीगु खः ।
ज्याझ्वलय् मुक्कं १८ गू खलः व संस्थां ब्वति काःगु खःसा अन थीथी झिगू खलः व संघपाखें थःपिनि प्रतिवेदन न्ह्यब्वःगु खः। लिसें सहभागी प्रतिनिधितलिसे अन्तर्क्रिया नं जूगु खः।
ज्याझ्वलय् समितिया उपमहासचिव हेमराज शाक्यं सुभाय् देछानादिल। ज्याझ्वःया सफलताया निंतिं भिक्षु अश्वघोषं नं भिंतुना बियाबिज्याःगु खः। ज्याझ्वः न्ह्यः हेटौंडा ज्ञानमाला भवन खलः व प्रज्ञा ज्ञानमाला भजन खलःपाखें भजन नं न्ह्यब्वःगु खः ।
