जमिम शाहया हत्या छोटा राजनं
प्रहरीया कमजोरी : गृहराज्यमन्त्री / अनुसन्धानया निंतिं कार्यदल गठन
स्पेशटाइम नेटवर्क व च्यानल नेपालया अध्यक्ष जमिम शाहया हत्याया जिम्मा छोटा राजन पुचलं काःगु दु । सोमवाः न्हिनय् छोटा राजन पुचःया दुजः भरत नेपालीं एभिन्युज टेलिभिजनयात फोन यानाः उगु घटनाया जिम्माः काःगु खः । नेपालीं शाहं भारत विरोधी ज्या याःगुलिं हत्या यानाःगु खँ धाःगु दु ।
अथेहे गृहमन्त्री रिजवान अन्सारीं शाह हत्या प्रकरणय् प्रहरीया कमजोरी दुगु खँ स्वीकार यानादिसें थुकीया बारे अनुसन्धानं यक्व खँ सिकेधुनाःगु खँ धयादिल । नापं वयेकलं अपराधीयात याकन ज्वनीगु दाबी नं यानादिल । वयेकलं हत्याय् राष्ट्रिय अन्तर्राष्ट्रिय अपराधीतय् संलग्नता दुगु कनादिल ।
अथेहे हत्या सम्बन्धय् अनुसन्धान यायेत प्रहरी प्रधान ज्याकूथीं प्रहरी प्रधान ज्याकूया डिआईजी राजेन्द्रमान सिंह भण्डारीया नेतृत्वय् प्यम्ह दुजः दुगु कार्यदन गठन याःगु दु । कार्यदलय् एसएसपी रणबहादुर चन्द, एसपी मिलन बस्नेत व डिएसपी दिवस उदास दुजः कथं दी । अथेहे मन्त्रिपरिषदं पुनरावेदन अदालतया पूर्वन्यायाधीश गोविन्द पराजुलीया संयोजकत्वय् न्याम्ह दुज: दुगु समिति व महानगर आयुक्तया ज्याकूथीं एसएसपी माधव जोशीया संयोजकत्वय् समिति गठन या:गु दु ।
शाहयात आइतवाः न्हिनय् लाजिम्पाटय् मोटरसाइकलय् वःपिं निम्ह अज्ञात मनूतय्सं गोली क्येकाः हत्या याःगु दु ।
