थीथी निगू दुर्घटनाय् प्यम्ह सित
सोमवाः जूगु निगू बिस्कं बिस्कं दुर्घटनाय् लाना प्यम्ह सिगु दुसाः न्हय्म्ह घाःपाः व स्वम्ह तनाच्वंगु दु ।
सोमवाः पिंडा गाविसया बांगे धइगु थासय् छगः ट्रक त्रिशुलीइ कुतुवनाः निम्ह सिगु दुसाः ट्रक चालक सहित स्वम्ह तनाच्वंगु दु । नारायणगढं येँ पाखे वयाच्वंगु ना. ४. ख. २१६३ नम्बरया मालवाहक ट्रक बांगे धइगु थासय् सतकया मोडं त्रिशुली कुतुवंगु खँ ईलाका प्रहरी ज्याकू गजुरीं धाःगु दु । उगु दुर्घटनाय् लानाः ट्रकया सहचालक नीदँया मुकेश महतो व बाराया न्यय्दँया हाकीम मिया सिगु दु ।
अथेहे नवलपरासीया दाउन्नेय् सोमवाः न्हिनय् छग: बस दुर्घटना जुयाः निम्ह सिगु दु । अथेहे दुर्घटनाय् लाना न्हय्म्ह घाःपाः जूगु दु । येँ नं पश्चिमय् वनाच्वंगु ना. २. ख. ६९५० नम्बरया बस दाउन्ने डाँडाय् दुर्घटना जुयाः छम्ह घटनास्थलय् मदुगु खःसा मेम्हेसित वासः याकेत लुम्बिनी अस्पताल यंकेगु झ्वलय् लँय् मदुगु खः । सिपिं निम्हेसियां नां धाःसाः सिकेमफुनीगु खँ प्रहरीं धाःगु दु । अथेहे घाःपाः जूपिनि वास: बुटवलय् जुयाच्वंगु खँ नं प्रहरीं धाःगु दु ।
