उपराष्ट्रपति झापाखें निक्वःगु खुसीइ सपथ ग्रहण
सपथया भाय् मैथिली व खस्
हिन्दी भासं सपथ कयाः निश्कृय जुयादीम्ह उपराष्ट्रपति परमानन्द झां आइतवाः निक्वःगु खुसीइ सपथ ग्रहण यानादीगु दु । थौंया सपथ ग्रहण नपां वयेक हानं उपराष्ट्रपतिया पदय् क्रियाशील जुयादीगु दु ।
आइतवाः न्हिनय् राष्ट्रपति भवन शितल निवासय् राष्ट्रपति डा. रामवरण यादवं वयेकयात सपथ ग्रहण याकादीगु खः । उपराष्ट्रपति झां थःगु मां भाय् मैथाली व खस् नेपाली निगूलिं भासं सपथ ग्रहण यानादीगु खः ।
सपथ ग्रहण ज्याझ्वलय् प्रधानमन्त्री माधवकुमार नेपाल, प्रधानन्याधीश अनुपराज शर्मा, मन्त्रीत लगायत थीथी दलया नेतातय् उपस्थिति दुगु खः । राष्ट्रपति, प्रधानमन्त्री व मन्त्रीतय् ज्याझ्वः बहिष्कार यानावयाच्वंगु प्रमुख विपक्षी दल एनेकपा (माओवादी)या नेतात धाःसाः ज्याझ्वलय् उपस्थित जुयामदी ।
थ्वस्वयां न्ह्यः झा नं हिन्दी भासं सपथ कयादीगु ख: । उकीयात वंगु साउनय् सर्वोच्च अदालतं बदर यानाः खस् नेपाली भासं सपथ कायेत आदेश ब्यूगु ख:सां उकियात झां अवज्ञा यायेवं उपराष्ट्रपतिया पद निश्कृय जूगु खः । अन्तरिम संविधान संशोधन यानाः राष्ट्रपति, उपराष्ट्रपति व प्रधानमन्त्रीं थःगु मां भासं सपथ काये दइगु व्यवस्था यायेवं वयेकयात हानं सपथ कायेगु ह्वताः चूलाःगु खः ।
