जनकपुरया न्या नयेत बिचाः यानादिसँ
येँ (सन्ध्या टाइम्स)/'जनकपुरया ताजा न्या' धइगु साइनबोर्ड तयाः मियातःगु न्या यदि छिं जनकपुरं हे वःगु धकाः न्याना यंकल धाःसा बिचाः यानादिसँ, छितः झंगः लाःगु जुइफु। छाय्धाःसां थौंकन्हय् जनकपुरं येँपाखे न्या हे छ्वया महयेधुंकूगु खँ जनकपुरया न्या ब्यापारीतय्सं धाःगु दु।
छुं जुयाः येँय् जनकपुरया न्या न्यायेगु हे दत धाःसा व न्याये न्ह्यः नं हानं छक्वः बिचाः यानादिसँ, छाय्धाःसां व विषादी छ्यलाः स्यानातःम्ह न्या नं जुइफु ।
थौंकन्हय् जनकपुरया थीथी पुखुली लहिनातइपिं न्यातय्त रिसईबीया कारणं विष तयाः स्याना बीगु ज्या तसकं अप्वयाच्वंगु दु। छम्ह व्यवसायीं मेम्ह व्यवसायीया पुखुली विष तयाः न्या स्याना बीगु कारणं अन च्वंपिं न्या व्यवसायीत थौंकन्हय् तसकं निराश जुयाच्वंगु दु ।
ईख, ईर्ष्या व दुश्मनीया कारणं पुखुली विष तयाः न्या स्याना बीगु कारणं गुलिखे व्यवसायीतय्सं थौंकन्हय् न्या लहीगु ज्या हे त्वःता बीधुंकल। यानाच्वंपिंसं नं तसकं म्हो जक उत्पादन यानाच्वंगु दु। उत्पादन हे म्हो जूगु कारणं थौंकन्हय् जनकपुरया न्या जनकपुरय् मीगु मगाःगु कारणं येँय् छ्वया हयेफुगु अवस्था मदुगु खँ नं व्यवसायीतय्सं धाःगु दु।
जनकपुरयात पुखूया पुखूयागु नगर धाइ। उकिं थ्व लागा न्या उत्पादनया लागिं देय्न्यंकं नांजाः। तर थौंकन्हय् वयाः छम्हं मेम्हेसिया न्या स्याना बीगु घटनां अनया न्या व्यवसाय छगू कथं ठप्प धइथें जुयाच्वंगु खँ नं व्यवसायीतय्सं धाःगु दु। कर्पिनि पुखुली विष तइपिं मनूतय्त ज्वने मफयाच्वंगु गुनासो नं व्यवसायीतय्गु दु ।
