एमाले विवाद अन्ततः केन्द्रीय कमिटीइ
येँ (सन्ध्या टाइम्स)/एमाले दुने राज्य पुनर्संरचनाया खँय् पिहां वःगु विवाद समाधान याये मफयाः अन्ततः पार्टीया केन्द्रीय कमिटीं हे थ्व समस्या समाधान यायेगु धकाः जिम्मा बीगु निर्णय जूगु दु। म्हिगः क्वचाःगु पार्टी पोलिटब्युरो बैठकं थ्व विवाद केन्द्रीय कमिटीइ हयाः समाधान यायेगु निर्णय याःगु खः ।
पार्टीया केन्द्रीय कमिटी बैठक फागुनया न्हापांगु वाःपाखे जक च्वनीगु सम्भावना दुगु खँ सूत्रं धाःगु दु ।
एमाले दुने थौंकन्हय् ब्वलनाच्वंगु निगू गुटया कचवं प्रत्यक्ष रुपं संविधान निर्माणया ज्याय् नं खने दुगु खः। संविधान निर्माणया झ्वलय् महत्वपूर्ण जुया वःगु बुँदात राज्य पुनर्संरचना लगायत शासकीय स्वरुपया खँय् झलनाथ गुट व केपी ओली गुट दथुइ विवाद जूगु खः। थ्व निगुलिं विषयय् पार्टीं न्हापा हे निर्णय याना तयेधुंकूगु बुँदात नं आः वयाः हिले माल धकाः केपी गुटं प्रस्ताव हयेवं विवाद समाधान हे याये मफयेक तच्वया वंगु खः। संविधानसभा दुने हे थ्व विषयय् एमाले सभासद्त स्पष्ट रुपं निगू ध्रुवय् विभाजित जूवंगु खः। गुलिखे विश्लेषकतय्सं संविधान निर्माणया थीथी बुँदाय् विवाद जुयाः हे पार्टी विभाजन समेत जू वनेफु धयाहःगु दु ।
