रिमिक्स म्यें वरिष्ठ गायकत हैरान
येँ (सन्ध्या टाइम्स)/थीथी गायक गायिकातय्सं न्हापा हे हाला तयेधुंकूगु कालजयी म्येँतय्त थौंकन्हय् रिमिक्स यानाः लाथेपाथे बजारय् पित हयेगु ज्या ला जुयाच्वंगु हे जुल। आः थ्वहे झ्वलय् नांजाःपिं गायक प्रेमध्वज प्रधान व योगेश वैद्यपिनि म्येँयात नं उकथं रिमिक्स यानाः पित हःगुलिं उकियात कयाः धाःसा कारवाही यायेगु लागिं पलाः न्ह्याकूगु दु ।
ताल म्युजिक नांगु छगू कम्पनीं वय्कःपिनि अनुमति हे मकासे वय्कःपिंसं हालातःगु म्येँयात रिमिक्स यानाः पित हःगु खः। थुकियात वय्कःपिंसं प्रतिलिपि अधिकार ऐनया हनन् खः धासें कानुनी उपचारया निंतिं पलाः न्ह्याकूगु दु। उकिया निंतिं सम्बन्धित मन्त्रालय, विभागय् स्वापू तयेगु ज्या जुइधुंकूगु ।
स्रष्टातय् सिर्जना सुनां नं खुया मकायेमा धकाः नेपालय् नं प्रतिलिपि अधिकार ऐन २०५९ दयेका तःगु दु। थ्व समस्या खास यानाः संगीत ख्यलय् दकलय् अप्वः खने दयाच्वंगु दु। थुकिं सम्बन्धित स्रष्टाया सम्मान व सिर्जनाय् लिच्वः लाकीगु जक मखु देय्या राजश्व मुनेज्याय् नं लिच्वः लाकीगु खँ विज्ञतय्सं धायेगु याः ।
नेपालय् थुकियात क्वातुक लागू यायेगु लागिं थीथी कथंया गतिविधि जुयाच्वंसां उकियात क्वातुके धाःसा मफुनि ।
- सबिता महर्जनपाखें
