येँय् दकलय् अप्वः मोबाइल तनीगु थाय् आकाशे ताँ
येँ (सन्ध्या टाइम्स)/येँया थीथी थासय् लँ पार यायेत आकाशे ताँत दयेकातःगु दु, तर मनूत धाःसा उगु ताँपाखें मवँसे खतरा दुसां क्वं हे वनेगु याइ। छाय्? उकिया कारण खः, अज्याःगु आकाशे ताँय् जुइगु लुटपाट। सुथ न्हापां जुइमा वा सनिलय् जुइमा, मनू भचा कम जुल कि अन लुटपाट अप्वयेधुंकी। न्हिनय् भिडभाडय् नं मनूतय् दकलय् अप्वः मोबाइल तनीगु थाय् थ्वहे आकाशे ताँ जुयाच्वंगु दु। उकिं मनूतय्सं थ्व ताँ छ्यले मययेकू ।
येँदेय्या भित्री लागाया सुरक्षा विषयय् म्हिगः महानगरीय प्रहरी परिसरलिसे जूगु अन्तर्क्रियाय् थ्व खँ पिहां वःगु खः। अन्तर्क्रियाय् सहभागी स्थानीय जनतां अन पैदल गस्ती खटे यायेत प्रहरीयात इनाप याःगु दु ।
जनसेवा सामुदायिक केन्द्र तथा सामुदायिक प्रहरी सेवाया ग्वसालय् उगु ज्याझ्वः जूगु खः ।
ज्याझ्वलय् सुरक्षाया विषयय् वःगु न्ह्यसःयात डीएसपी लालमणि आचार्य व जनसेवाया इन्चार्ज तुलबहादुर कार्कीं लिसः बियादीगु खः। वय्कःपिंसं थ्व लागाया सुरक्षा क्वातुकेगु लागिं माःगु प्रवन्ध यायेगु बचं बियादिल।
जनसेवा सामुदायिक केन्द्रया नायः विद्यासुन्दर शाक्यया सभापतित्वय् जूगु उगु ज्याझ्वलय् लिउछ्यांज्ये सुभानकुमार श्रेष्ठं लसकुस यानादीगु खः। लिसें पुलांम्ह वडाध्यक्ष विकासभक्त श्रेष्ठ नापं मेपिं वक्तातय्सं नं नुगःखँ प्वंकादीगु खः ।
