स्वास्थ्यमन्त्रीपाखें निरीक्षण
येँ (सन्ध्या टाइम्स)/स्वास्थ्य तथा जनसंख्या मन्त्री उमाकान्त चौधरीं डल्लु आवासस्थित सामुदायिक स्वास्थ्य सेवा परिषद्पाखें बिया वयाच्वंगु स्वास्थ्य सेवाया निरीक्षण यानादिल। समाजसेवी तीर्थलाल श्रेष्ठ व डा. विजय लाल श्रेष्ठपिनि विशेष पहलय् उगु निरीक्षण ज्या जूगु खः।
निरीक्षण लिपा जूगु ज्याझ्वलय् न्ववासें मन्त्री चौधरीं परिषद्पाखें बिया वयाच्वंगु सेवाया लागिं सुभाय् बिसें परिषद्यात सरकारपाखें बिया वयाच्वंगु ग्वाहालि निरन्तर याना तयेगु व थुकियात अस्पतालया स्तरय् थ्यंकेत मन्त्रालयपाखें नं फुगु ग्वाहालि याये धयादिल ।
ज्याझ्वलय् परिषद्या अध्यक्ष रत्ननारायण न्हूजवाः साय्मि नापं हरिगोपाल श्रेष्ठ, मेजर भिमबहादुर गुरुङ्ग, डा. प्रकाशनिधि तिवारी, डा. डीएल भरखेरपिंसं नुगःखँ प्वंकादीगु खः। परिषद्यात सचिव मेजर भिमबहादुर गुरुङ्ग, दुजःपिं रवि रंजित, प्रकाशकुमार श्रेष्ठ व हिराकाजी महर्जनपिनि पहलय् मन्त्रालयपाखें बजेट हयेगु व्यवस्था जुयाच्वंगु दु ।
