कारोबार सामान्य सुधार
येँ (सन्ध्या टाइम्स)/नेपाल स्टक एक्सचेन्जय् थ्व छवाःया शेयर कारोबारं बजार परिसुचक नेप्से १० दशमलव २४ अंकं कुहां वंगु दु। वाःया न्हापांगु न्हि ५१२ दशमलव ३४ अंकं शुरु जूगु शेयर कारोबार बजार परिसुचक मदिक कुहां वयेवं वाःया लिपांगु न्हि ५०१ दशमलव २४ अंकय् थ्यंगु दु ।
थ्व वाःया दुने नेपाल स्टक एक्सचेन्जय् सछिगू कम्पनीया ४६२७ गू शेयर कारोबारं झिंखुगू करोड ख्वीछगू लख पीनिद्वः तका दांया स्वंगू लख स्वीनिद्वः व खुसः कित्ता शेयर न्याये-मी जुल। थ्वयां न्ह्यः वंगु वालय् ५१३७ गू कारोबारं स्वंगू लख न्यय्छद्वः व खुसः कित्ता शेयर न्याये-मी जुयाः झिंखुगू करोड ख्वीगू लख नीप्यद्वः तका दां कारोबार जूगु खः। वंगु वाः स्वयां थ्व वालय् शुन्य दशमलव शुन्य ७ प्रतिशतया ल्याखं दांया कारोबार थहां वंगु दु ।
थ्व वालय् स्टक एक्सचेन्जय् जूगु कूल कारोबारय् ५४ दशमलव १८ प्रतिशत 'क' वर्गया कम्पनीं काराबार याःगु दु। 'क' वर्गय् लाःगु कम्पनीया जक गुंगू करोड तका दांया शेयर न्याये-मी जूगु दु ।
लिसें थुगु समुहया कारोबार मापन याइगु सेन्सेटिभ इन्डेक्स नं थ्व छवाःया दुने २ दशमलव ८९ अंकं कुहां वल। वाःया न्हापांगु न्हि १२५ दशमलव ८१ अंकं शुरु जूगु कारोबार १२२ दशमलव ९२ अंकय् थ्यंकाः बजाः बन्द जूगु खः ।
थुगु वालय् स्वंगू करोड प्यंगू लख दां कारोबार याःगु लिधंसाय् स्टायण्डर्ड चार्टर्ड बैंक, ख्वीनिद्वः कित्ता शेयर व छवाःया दुने दकलय् अप्वः ११४९ क्वः तक कारोबार याःगु लिधंसाय् भिवोर विकास बैंक दकलय् न्ह्यःने लाःगु दु ।
थ्व वालय् नेपाल धितोपत्र बोर्डय् महाकाली विकास बैंकया साधारण शेयर एनआईसि बैंक, साल्ट ट्रडिङ्ग, श्री इन्भेष्टमेण्ट फाइनान्सया बोनस गुडवील फाइनान्सया बोनस व हकप्रद शेयर सुचीकृत जूगु दु ।
