बेलायती सेनाध्यक्ष येँय्
बेलायती सेनाध्यक्ष डेभिड जुलिन रिचार्डस् खुन्हुन्यंकया औपचारिक भ्रमणया निंतिं शनिवाः येँय् थ्यंकादीगु दु । पूर्व निर्धारित तालिका कथं बिहीवाः बहनी हे नेपाः वयेगु ज्याझ्वः दुगु खःसां वयेक अकस्मात हङकङ झायादीगु खः ।
वयेक शनिवाः न्हिनय् हङकङं थाइ एयर पाखें येँय् थ्यंकादीगु खः । वयेकयात नेपाली सेनाया सेकेण्डम्यान बलाध्यक्ष रथी तोरणजंगबहादुर सिंहं त्रिभुवन अन्तराष्ट्रिय विमानस्थलय् लसकुस यानादीगु खः ।
नेपाः भ्रमणया झ्वलय् बेलायती सेनाध्यक्ष रिचार्डसं राष्ट्रपति डा. रामवरण यादव, प्रधानमन्त्री माधवकुमार नेपाल, सरकारी उच्चअधिकारीतय्त नापलाइगु ज्याझ्वः दु । अथेहे वयेकलं पोखराय् च्वंगु बृटिश गोर्खा क्याम्पया निरिक्षण यानादीगु जूगु दु । नापं वयेकलं सगरमाथा क्षेत्रया माउण्टेन फ्लाइट याइगु ज्याझ्वः नं दु ।
वयेक थःगु नेपाः भ्रमण क्वचायेकाः वइगु माघ २६ बेलायत लिहांझायादी ।
