राप्रपा व राजपा दथुइ एकीकरण
न्यादँ न्ह्यः विभाजित पशुपति शसशेर राणां नेतृत्व याःगु राष्ट्रिय प्रजातन्त्र पार्टी व सूर्यबहादुर थापां नेतृत्व याःगु राष्ट्रिय जनशक्ति पार्टी दथुइ शनिवाः औपचारिक रुपं एकताया घोषणा जूगु दु ।
पार्टी एकीकृण लिपाः मंकाः पार्टीया नां राष्ट्रिय शक्ति प्रजातन्त्र पार्टी तःगु दुसां थुकीयात औपचारिक रुपं महाधिवेशन लिपाः जक हिलीगु खँ धाःगु दु । महाधिवेशन मजूतल्ले पार्टी केन्द्रीय समितिया अध्यक्षता निगूलिं पार्टीं पालमपाः याइगु व्यवस्था याःगु दु । अथेहे महाधिवेशन मजूतल्ले निगूलिं पार्टीया केन्द्रीय समिति यथावत जुइगु व महाधिवेशन लिपाः जक न्हूगु केन्द्रीय समिति गठन यायेगु सहमति जूगु दु ।
राणा व थापां निम्हेसियां मंकाः रुपं एकीकरणया घोषणा यानादीगु खः । एकीकरण ज्याझ्वलय् निम्ह नेतातय्सं आम कार्यकर्तातय् भावना व देय्या प्रजातान्त्रिक शक्तियात थप बल्लाकेत पार्टी एकताया घोषणा यानाःगु खँ धयादिल ।
