चैत्र २४ गते स्वंगू वामया नेपाल बन्द

येँ (सन्ध्या टाइम्स)/स्वंगू कम्युनिष्ट पार्टीतय् दथुइ कार्यगत एकता यानाः जनआन्दोलन दिवसया न्हि कुन्हु हे नेपाल बन्द यायेगु घोषणा याःगु दु। ताः ई न्ह्यवंनिसें गृहकार्य यानाः स्वंगू मुद्दाय् कार्यगत एकताया घोषणा यासें वइगु जनआन्दोलन दिवस कुन्हु चैत्र २४ गते नेपाल बन्दया घोषणा याःगु खः ।

राष्ट्रिय स्वाधिनताया रक्षा, जनसंविधान निर्माण व थहांवंगु बजाःभाः क्वकायेमाःगु माग यासें ऋषि कट्टेलं नेतृत्व यानादीगु नेकपा (एकिकृत), मातृका यादवं नेतृत्व यानादीगु नेकपा (माओवादी) व मणि थापां नेतृत्व यानादीगु क्रान्तिकारी कम्युनिष्ट पार्टी जानाः मंकाः आन्दोलन थ्वहे वइगु चैत्र २४ गते नेपाल बन्द यायेगु ज्याझ्वः दयेकूगु खः।
नेता ऋषि कट्टेलं 'सन्ध्या टाइम्स'लिसे खँ ल्हासें स्वंगू कम्युनिष्ट पार्टी दथुइ कार्यगत एकता यानाः आन्दोलन यायेगु झ्वलय् नेपाल बन्द नापं मेमेगु ज्याझ्वः नं पित बियागु दु जानकारी बियादिल ।

वय्कलं कंस माघ २४ गते थःपिनिगु मागत दुथ्याकाः प्रधानमन्त्री माधव कुमार नेपालयात ज्ञापन पत्र बीगु ज्याझ्वः दुगु खँ नं कनादिल। वयां लिपा छसिकथं २६ गते संविधानसभाया अध्यक्ष सुवास चन्द्र नेम्वाङयात ज्ञापनपत्र बीगु, फागुन १ गतेनिसें १७ गते तक प्रचारात्मक ज्याझ्वः यायेगु ग्वसाः दु। अथे हे चैत्र ६ गतेनिसें २० गते तक देय्न्यंकं विरोध सभा यायेगु, राजनीतिइ जुयाः नं भ्रष्टाचार याःपिनि विरुद्ध भण्डाफोर अभियान न्ह्याकेगु, चैत्र २० गतेनिसें देय्न्यंकं मोटरसाइकल र्‍याली, जुलुस, मसाल जुलुस नापं थीथी कथंया संघर्षया ज्याझ्वः यायेगु नापं चैत्र २४ गते नेपाल बन्द यायेगु जुइ धकाः नं नेता कट्टेलं जानकारी बियादीगु दु ।