संविधानसभा न्ह्यःने नेवाःतय् धर्ना
येँ (सन्ध्या टाइम्स)/नेवाःतय्गु राष्ट्रिय संगठन नेवाः देय् दबूया आह्वानय् थौं न्हू बानेश्वरया संविधानसभाया पश्चिम गेटय् नेवाः ख्यःया न्ह्यलुवा नापं कार्यकर्तात धर्ना च्वंगु दु।
थौं न्हिनय् १२ बजेनिसें १ बजे तक धर्ना च्वनेगु ज्याझ्वः दुगु खँ नेवाः देय् दबूया नायः नरेश ताम्रकारं 'सन्ध्या टाइम्स'यात कनादीगु दु। नेवाःत थःपिनिगु हे माग ज्वनाः संविधानसभाया न्ह्यःने धर्ना च्वंगु थ्वहे न्हापांखुसी खः। न्हूगु संविधान इलय् हे जारी यायेमाःगु, संविधानय् नेवाः स्वायत्त राज्ययात सुनिश्चित यायेमाःगु, आदिवासी जनजातिया अधिकार सुनिश्चित यायेमाःगु, राज्य पुनर्संरचना नापं राज्य शक्ति बाँडफाँड समितिं तयार याःगु राज्य पुनर्संरचनाया सीमाङकनय् नेवाःतय् बाहुल्यता दुगु नापं ऐतिहासिक आधार दुगु लागा तकं नेवाः प्रदेशय् दुमथ्याकूगु जुयाः ऐतिहासिकता नापं बाहुल्यताया आधारय् नेवाः राज्यया सीमाङकन यायेमाःगु नापं थीथी कथंया माग न्ह्यथँसें अथे नेवाःत संविधानसभा न्ह्यःने धर्ना च्वंगु खः ।
उगु धर्ना ज्याझ्वलय् नेवाः देय् दबूया नायः नरेश ताम्रकार, देय् दबूया पदाधिकारी नापं जातीय खलः पुचःया आपालं नेता व कार्यकर्तातय्सं ब्वति कयाच्वंगु दु ।
