राजनीतिक खिंचातानी व न्हूम्ह गभर्नर
नेपाल राष्ट्र बैंकया गभर्नर नियुक्त यायेगु ज्याय् जुयाच्वंगु ढिलाईं यानाः देय्या अर्थतन्त्रय् हे लिच्वः लाइगु खतरा वःगु खँ अर्थविद्तय्सं धया हःगु दु। देय्या समग्र अर्थतन्त्रया विश्लेषण यानाः सरकारयात समेत मौद्रिक नीति दयेकेत सुझाव बीगु जिम्मेवारी दुम्ह गभर्नर नियुक्तिया ज्या खास यानाः राजनीतिक खिंचातानीया कारणं हे ढिला जुयाच्वंगु खः। आर्थिक ख्यःया विज्ञतय्त हयाः ज्या याकेमाःगु थासय् नं राजनीतिक पार्टीया कार्यकर्ता भर्ती यायेगु नेतातय् चाहनां यानाः देय्या अर्थतन्त्रय् हे लिच्वः लायेफइ थ्यंकया थ्व समस्या पिहां वःगु खः ।
नेपाः जक मखु थौंकन्हय् विश्वय् हे आर्थिक स्थिति डांवाडोल जुयाच्वंगु दु। थ्व अवस्थापाखें नेपाः नं प्रभावित जुइगु स्वाभाविक खः। उकिसनं नकतिनि युद्धपाखें मुक्त जुयाः न्हूगु आर्थिक दिशा ज्वनेत स्वयाच्वंगु नेपालय् आर्थिक विकासया नेतृत्व यायेमाःम्ह गभर्नर हे थुलिमछि ई खाली जुयाच्वनीगु धाथें नं खतराया संकेत खः। छुं गथे जुयाः तुरुन्त हे तःधंगु आर्थिक निर्णय यायेमाःगु अवस्था वल धाःसा सुनां गय् यानाः यायेगु व उकिं अन्य कथंया लिच्वः लात धाःसा उकिया जिम्मा सुनां कायेगु? मेबलय् जूसा गभर्नर कायम हे दनिबलय् न्हूम्ह गभर्नर नियुक्तिया प्रक्रिया न्ह्यायेधुंकी। तर थुगुसी पुलांम्ह गभर्नरया म्याद फुइधुंकाः नं न्हूम्ह नियुक्ति जुइगु छाँट मवःनि। हरेक खँय् राजनीतिक हस्तक्षेप जुइगु झीगु खराब प्रचलनं यानाः गभर्नर नियुक्तिया थ्व समस्या जुयाच्वंगु खः। हरेक पदय् राजनीतिक भागबण्डा जुइमाःगु व उकिया हे लिधंसाय् सत्ता समीकरण समेत मिले यायेमाःगु प्रथां यानाः गभर्नर पद आक्रान्त जुयाच्वंगु दु ।
