तच्वया वंगु शिक्षा करया विवाद

निजी विद्यालयतय्सं पुलेमाःगु धकाः सरकारं थुगुसीया बजेटय् व्यवस्था याःगु शिक्षा करया विवादं सरकार व शिक्षण संस्थातय् दथुइ हानं तनाव पिकया बिउगु दु । न्हापा न्हापा गबलें पुलेम्वाःगु थ्व करया व्यवस्था जुइसातकि दकलय् न्हापां ला थ्व कर सुनां पुलेगु धइगु विवाद निं न्ह्यःने वःगु दु । सरकारं प्रति विद्यार्थी ५ प्रतिशतया ल्याखं थ्व कर पुलेगु धकाः घोषणा याःगु दु । तर थ्व करया दां विद्यालयं पुलेगु खः वा अभिभावं पुलेगु खः धइगु विवाद वःगु दु । सरकारं थ्व कर विद्यालयं पुलेमाः धयाच्वंगु दुसा विद्यालयतय्सं अभिभावकयाके कायेगु धयाच्वंगु दु । विवाद ताःहाकः जुयाः आः कर हे पुले मखु धइगु तकया स्थिति सिर्जना जूगु दु । सरकारं कायेगु धकाः निर्धारण यायेधुंकूगु कर मपुल धाःसा कारवाही यायेगु बाहेक मेगु उपाय दइ मखु । छुं जुयाः थुकी कारवाहीया पलाः न्ह्याकल धाःसा उकी हानं विद्यालयतय्सं विरोधया पलाः ल्ह्वनीगु नं निश्चित दु । फलतः उकिया लिच्वः हानं वहे विद्यार्थी व अभिभावकयात लाः वनी । उकिं थ्व विवादया दथुइ छुं नं पलाः ल्ह्वनेबलय् कम से कम नं विद्यार्थी व अभिभावक प्रभावित मजुइगु उपाय नालेत निगुलिं पक्ष प्रतिवद्ध जुइमाः ।

सरकारं शिक्षा थेंज्याःगु ख्यलय् तकं कर काल धकाः विद्यालयत तम्वयाच्वंगु दु । तर विद्यालयतय्सं नं शिक्षायात व्यापारीकरण यानाः ध्यबा कमे यायेगु ख्यः दयेकाच्वंगु कारणं उमिसं कर मपुसें गाइ ला धकाः न्ह्यसः तईपं नं मदुगु मखु । यदि शिक्षा व्यापार खःसा अन कर पुलेमाःगु नं अनिवार्य खः । तर झीथाय् शिक्षा छु खः थ्वहे निर्धारण मजूनि । शायद थ्व कर प्रकरणं थ्व खँयात नं निर्धारण याना बी जुइ ।

More Stories Like this