सरकार क्वदलीमखु : पोखरेल
सूचना व संचार मन्त्री नापं सरकारया प्रवक्ता शंकर पोखरेलं वर्तमान सरकार क्वमदलीगु दाबी यानादीगु दु । वयेकलं छगू कोठाय् च्वनाः सल्लाह यायेवं सरकार क्वमदलीगु धयादिल ।
प्रेस चौतारी रुपन्देहीं बिहीवाः बुटवलय् ग्वसाःग्वःगु पत्रकार सम्मेलनय् मन्त्री पोखरेलं वर्तमान सरकारं संकट व हाथ्याया सामना यायेफुगुलिं सुनां सरकार परिवर्तन यायेगु खँल्हायेवं अज्याःगु खँय् सरकारं मतलब मयाइगु दाबी यानादिल । वयेकलं थ्व सरकार गठन जुइवं संकटय् लानाच्वंगु धयादिसें आः तक अज्याःगु दक्वं संकटया सामना यायेफुगु सरकार लिपाःया संकटया सामना यायेत नं सक्षम जूगु धयादिल ।
अथेहे वयेकलं माओवादीं ल्ह्वंगु मुद्दां वर्तमन सरकार क्वमदलीगु बरु माओवादी नेतृत्वया सरकार हे असक्षम जूगु पुष्टि याइगु धयादिल । वयेकलं माओवादीं विनाकारण राष्ट्रपतियात सेना प्रकरणय् हयाः सरकारया विरोध यानाच्वंगुलिं माओवादी आन्दोलनया छुं अर्थ मदुगु धयादिल । माओवादीं आन्दोलन यानाच्वंसां सरकारं शान्ति सुरक्षा कायम यायेत सक्षम जूगु दाबी नं मन्त्री पोखरेलं यानादिल ।
