नेवाः देय् दबूया येँ जिल्ला स्वन
येँ (सन्ध्या टाइम्स्)/नेवाः देय् दबूया येँ जिल्ला भेला क्वचाल। नेवाः देय् दबू स्वनिगःया न्वकु धर्मशोभा तुलाधरया सभापतित्वय् देय् दबूया ज्याकुथी हे उगु भेला जूगु खः ।
ज्याझ्वलय् मू पाहां कथं झाःम्ह नेवाः देय् दबूया केन्द्रीय नायः नरेश ताम्रकारं संविधानसभाया राज्य पुनर्संरचना समितिं नकतिनि प्रस्तावित याःगु १४ प्रदेशया नक्सा व उकी नेवाः प्रदेशयात बियातःगु लागा प्रति असन्तुष्टि प्वंकुसें नेवाः लागा अझ विस्तार यायेमाःगु माग यानादिल। वय्कलं जातीय म्हसीका कायम यायेत व सत्ताय् नेवाःतय् पहुँच दयेकेत जुयाच्वंगु आन्दोलनय् सकलें नेवाःत छप्पँ जुयाः न्ह्यायेमाःगु बिचाः नं प्वंकादिल। ज्याझ्वलय् देय् दबूया मू दुजः अमररत्न वज्राचार्यं लसकुस यानादीगु खः ।
उगु हे भेलां नेवाः देय् दबूया येँ जिल्ला समिति व राष्ट्रिय परिषद्या दुजः ल्ययेगु ज्या नं जूगु खः। निगुलिं समितिइ सकलें दुजःत सर्वसम्मतं ल्यःगु खः। उकी येँ जिल्ला समितिया कजि ज्यापु महागुथिया न्हुछेकाजी महर्जन जुयादीगु दु। अथे न्वकु अमृतमान श्रेष्ठ, छ्यांज्ये मचाराजा महर्जन, लिउ छ्यांज्ये नविन मानन्धर, दांभरि अञ्जना ताम्राकार व दुजलय् मीरा कर्माचार्य श्रेष्ठ, लीला माली, धनबहादुर तिमिला, शारदामुनि वज्राचार्य, भाइराजा मानन्धर, रमेशमान नापित, धर्मराज शाक्य, विद्या चित्रकार, नृपेन्द्र मास्के व धनेन्द्र शाहीयात ल्यःगु दु ।
उकथं हे राष्ट्रिय परिषद्या दुजलय् गम्भीरमान महर्जन, धर्म मुनिकार, प्रकाशकुमार श्रेष्ठ, सरिता महर्जन, सूर्यबहादुर नकर्मी, बालकृष्ण श्रेष्ठ, विष्णु चित्रकार, नर्वदा श्रेष्ठ, सृजना प्रधान व प्रमिला सिंह च्वनादीगु दु ।
