संयन्त्रया बैठकय् वयादिसँ माधवजु: कोइराला
येँ (सन्ध्या टाइम्स)/राज्यनीतिक गतिरोध अन्त्यया नितिं नेपाली कांग्रेसया सभापति गिरिजाप्रसाद कोइरालाया नेतृत्वय् दयेकूगु उच्चस्तरीय राजनीतिक संयन्त्रप्रति सशंकित जुयादीम्ह प्रधानमन्त्री माधव नेपालयात संयन्त्रया कजि कोइरालां संयन्त्रया बैठकय् नियमित रुपं वयेत इनाप यानादीगु दु ।
कोइराला नाप लायेत थौं सुथय् वय्कःया छेँय् झाःम्ह प्रम नेपालयात कोइरालां उगु इनाप यानादीगु खः। प्रम नेपाल संयन्त्रया आमन्त्रित दुजः खःसां आः तक नं वय्कलं मुँज्याय् ब्वति धाःसा कयादीगु मदुनि ।
संयन्त्रय् सरकार परिवर्तनया प्रस्ताव माओवादी अध्यक्ष प्रचण्डं तयादिल धकाः संचार माध्यमय् समाचार वयेवं प्रम नेपाल संयन्त्रप्रति झन् हे सशंकित जुयादीगु खः। थौं कोइरालायात प्रम नेपालं 'उच्चस्तरीय राजनीतिक संयन्त्रय् थःगु नेतृत्वया सरकार परिर्वतनया खँ वयाच्वन, उपप्रधानमन्त्री सुजाता कोइरालां नं सरकार परिवर्तनया खँ ल्हाना जुल थ्व छु खः?' धकाः न्ह्यसः तयादीगु खःसा उकिया लिसलय् कोइरालां 'छि पत्रपत्रिका व थीथी संचार माध्यमय् वःगु समाचारया लिउ लिउ वने मजिल, बरु संयन्त्रया बैठकय् नियमित रुपं ब्वति काः झासँ' धयादीगु खः ।
सहलहया झ्वलय् देय्या राजनीतिक अवस्था, न्हूगु संविधान निर्माण, शान्ति प्रकृया, उच्चस्तरीय राजनीतिक संयन्त्र नापं थीथी विषययात कयाः नं खँ जूगु खः ।
संयन्त्रया मुँज्या स्थगित
थौं च्वनेमाःगु उच्चस्तरीय राजनीतिक संयन्त्रया बैठक स्थगित जूगु दु। बैठक विहिवाःपतिकं च्वनेगु धयातःगु खः। नेतातय् लिमलाःगुलिं थौंया बैठक स्थगित याःगु खः। छुं दिं न्ह्यः च्वंगु संयन्त्रया मुँज्यां विहिवाः पतिकं मुँज्या च्वनेगु निर्णय याःगु खः ।
