अन्ततः संवैधानिक आयोगय् माधव नेपाल
न्हूगु संविधान दयेकेगु लागिं स्वनातःगु थीथी समितित मध्यय् दकलय् महत्वपूर्ण संवैधानिक समितिइ एमालेया पुलांम्ह महासचिव माधव नेपाल हे नियुक्त जूगु दु । तर वय्कःयात उगु पदय् यंकेगु लागिं धाःसा एमालेया छम्ह सभासदं 'शहीद' जुइमाल ।
एमालेया सभासद् सुशीलचन्द्र अमात्यं थःगु पदं राजीनामा बियाः माधव नेपालयात संविधानसभाय् छ्वसें संवैधानिक समितिया नायः दयेकूगु खः । भाजु नेपालं म्हिगः बहनी लिबाक तक च्वगु संविधानसभाया बैठकय् उगु पद स्वीकार यासें संविधान च्वयेगु ज्याय् थम्हं फुगु भूमिका म्हितेगु खँ कनादिल । भाजु नेपाल २०४७ सालय् दयेकूगु संविधान मस्यौदा आयोगया नं छम्ह दुजः खः ।
थुगुसी संवैधानिक आयोगया अध्यक्ष दयेकेगु धकाः कांग्रेसं पुलांम्ह प्रधानन्यायाधीश विश्वनाथ उपाध्याययात संविधानसभाय् हःगु खः। तर थः अध्यक्ष जुइ मखनीगु जुइवं उपाध्यायं सभासद् त्याग यात । लिपा माधवयात उपाध्यायया हे खालीगु सीटं संविधान सभाय् यंकेगु खँ जूगु खः । तर नेकां सभापित कोइरालां सुयाकें मन्यँसें उपाध्यायया पदय् अच्युत पाण्डेयात नियक्त यायेवं माधवया लागिं मेम्हेस्यां पद त्वःतेमाःगु खः । राष्ट्रपति जुइ मखनाः माधव सरकार क्वःथलेगु कासाय् लगे जूगुलिं वय्कःयात ह्ययेकेत माओवादीं जिद्दी हे यानाः थुगु पदय् हःगु खँ धाःगु दु ।
