संस्कृतया प्रशिक्षार्थीपिंत दसिपौ
येँ (सन्ध्या टाइम्स)/नेपाल परम्परागत बौद्ध धर्म संघ येँ शाखाया न्हापांगु वार्षिक उत्सव थनया गुणाकार महाविहार (छुस्या बहाः) लय् जुल। शाखाया नायः रेवरत्न वज्राचार्यया सभापतित्वय् जूगु उगु ज्याझ्वलय् मू पाहां कथं बौद्ध अध्ययन केन्द्रीय विभाग त्रिविया प्रमुख डा. मिलनरत्न शाक्य झाःगु खः ।
संस्थाया दुजः प्रेमहिरा तुलाधरं लसकुस यासें न्ह्याःगु उगु ज्याझ्वलय् छ्यांज्ये तीर्थरत्न वज्राचार्यं वार्षिक प्रतिवेदन न्ह्यब्वयादीगु खःसा दांभरि रेमरत्न वज्राचार्यं ल्याःचाः न्ह्यब्वयादीगु खः ।
ज्याझ्वलय् ३० न्हु तक न्ह्याःगु संस्कृत भाषाया सीप विकास प्रशिक्षणय् ब्वति काःपिंत मूपाहां डा. शाक्यं दसिपौ लःल्हानादिल। उगु इलय् प्रशिक्षार्थीपाखें भूपतिरत्न वज्राचार्यं थःगु अनुभव कनादीगु खः ।
उगु हे ज्याझ्वलय् संस्थाया सफूकुथिया लागिं पद्मानन्द वज्राचार्यं ६० गू सफू नं लःल्हानादीगु खः ।
