रेल बन्द याःगुलिं लिक तोडफोड
येँ (सन्ध्या टाइम्स)/नेपाःया छगूयां छगू जक रेल सेवा कथं नांजाःगु जनकपुर-जयनगर रेल नं थौंकन्हय् बन्द जूगुलिं स्थानीय जनतां आक्रोश प्वंकूगु दु। मजदूर हडतालं यानाः वंगु झिन्हु न्ह्यवंनिसें उगु रेल सेवा बन्द जुयाच्वंगु खः। सेवा बन्द जुयाः आक्रोशित जूपिं स्थानीय जनतां म्हिगः उगु रेल जुइमाःगु लिक समेत तोडफोड याना बिउगु दु। यदि याकनं सेवा शुरु मयात धाःसा अझ तःधंगु आन्दोलन यायेमालीगु ख्याच्वः नं उमिसं बिउगु दु। रेल सेवा याकनं चायेकेमाल धइगु माग यासें स्थानीय जनतां अन नाराबाजी यासें जुलुस समेत पिकाःगु खः ।
धनुषा लागां भारत वनेगु अःपुगु माध्यम जुयाच्वंगु उगु सेवा बन्द जूगुलिं स्थानीय जनता थौंकन्हय् मेमेगु हे ताःहाकःगु लँपु छ्यलेत बाध्य जुयाच्वंगु दु ।
