नेप्से ५०० अंक सतिक
येँ (सन्ध्या टाइम्स)/बजार परिसुचक नेप्से कुहां वयेगु क्रमिक रुपं निरन्तरता कायेवं ५०० अंक सतिक थ्यंगु दु। वंगु श्रावणया अन्तपाखे ७०० अंकं च्वय् लानाच्वंगु नेप्से वयां लिपा दथुइ छक्वः निक्वः सामान्य सुधार जुइगु बाहेक खास हे न्ह्यथनेबह जुइक सुधार जूगु मदुनि। म्हिगःया शेयर कारोबाय् नेप्से ४ दशमलव २३ अंकं कुहां वयाः ५०२ दशमलव ७९ अंकय् थ्यंगु दु। सेन्सेटिभ नं शुन्य दशमलव ९८ अंकं व फ्लोट शुन्य दशमलव ३९ अंकं कुहां वल।
समुहगत कारोबारपाखे दकलय् अप्वः जलविद्युत समुह १० दशमलव ४७ अंकं कुहां वःगु दु। थ्वयां लिपा विकास बैंक समुह ५ दशमलव २५ अंकं कुहां वल। वाणिज्य समुह ४ दशमलव २१ अंक, फाइनान्स १ दशमलव ३४ अंक व अन्य समुह १ दशमलव १७ अंकं कुहां वःगु दु। वीमा समुहया कारोबार जक १ दशमलव ८५ अंकं थहां वन ।
लगातार नेप्से कुहां वयाच्वंगु कारणं लगानीकर्तात जुयाच्वंगु इलय् झन् निराशा ब्वलंका बिउगु दु। म्हिगःया कारोबारय् ख्वीच्यागू कम्पनीया न्हय्प्यद्वः व न्यासः व स्वीगू कित्ता शेयर न्याये-मी जुयाः प्यंगू करोड न्हय्गू लख स्वीप्यद्वः तका दांया कारोबार जूगु दु। पीच्यागू कम्पनीया शेयर भाः कुहां वंगु दुसा झिंन्यागू कम्पनीया जक थहां वंगु दु। मेगु झिगू कम्पनीया शेयर भाः यथावत हे कायम जुल।
दांया कारोबारया ल्याखं स्टायण्डर्ड चार्टर्ड बैंकं न्हय्निगू लख ख्वीखुद्वः तका दांया शेयर कारोबार याःगु दु। कुमारी बैंकं दकलय् अप्वः लब काःगु दुसा मालिका विकास बैंकं अप्वः द्यापं फःगु दु ।
