'संयन्त्रया बैठकय् झासं'
उच्चस्तरीय राजनीतिक संयन्त्रया संयोजक नापं नेपाली कांग्रेसया सभापति गिरिजाप्रसाद कोइरलां प्रधानमन्त्री माधवकुमार नेपालयात संयन्त्रया बैठकय् उपस्थित जुइत इनाप यानादीगु खः । प्रधानमन्त्री संयन्त्रया आमन्त्रित दुजः जुसां संयन्त्रया बैठकय् छक्व नं उपस्थित मजूगुलिं कोइरालां थज्याःगु इनाप यानादीगु खः ।
बिहीवाः कोइराला निवास महाराजगंजय् जूगु खँल्हाबंलाया झ्वलय् कोइरालां थज्याःगु इनाप याःगु जानकारी प्रधानमन्त्री नेपालं बियादिल । वयेकलं कोइरालाया इनाप सकारात्मक जूगु नं कनादिल । नापं वयेकलं संयन्त्रया बैठकय् सरकार परिवर्तनया बारे छुं नं खँ मजूगु बारे कोइरालां स्पष्ट यानादीगु नं कनादिल ।
अथेहे खँल्हाबंलाय् माओवादी लडाकुया समायोजन, संयन्त्रया भूमिका, राजनीतिक गतिरोधया उपायया बारे सहलह जूगु खः । माओवादी लडाकुया रेखदेख, समायोज व पुनस्थापना सम्बन्धी विशेष समितिइ माओवादीं समायोजन याइगु लडाकुया ल्याः व मापदण्ड उच्चस्तरीय राजनीतिक संयन्त्र पाखें निर्णय यायेमाःगु प्रस्ताव याःगु इलय् प्रधानमन्त्री नेपाल व कांग्रेस सभापति कोइराला दथुइ खँल्हाबंला जूगु खः ।
