कांग्रेस व एमालेया स्वापू स्यंकेगु कुतः : केसी
नेपाली कांग्रेसया सहमहामन्त्री अर्जुननरिसंह केसीं कांग्रेस व एमाले दथुइ गम्भीर मतभिन्नता सिर्जना यानाः माओवादीं थःगु स्वार्थ सिद्ध यायेत स्वयाच्वंगु द्वपं बियादीगु दु ।
नेपाल प्रेस युनियनं नुवाकोटय् बिहीवाः ग्वसाःग्वःगु ज्याझ्वलय् न्ववानादिसें वयेकलं माओवादीं सरकार परिर्वतनया प्रस्ताव ह:या सत्तारुढ निगू प्रमुख दलया स्वापू स्यंकेत्यंगु धयादिल । वयेकलं सरकार परिवर्तनया कासाय् लगे जुइगुया छुं अर्थ मदुगु धयादिसें संविधान च्वयेगु व शान्ति प्रकृयायात पूर्णता बीगु खँयात त्वताः थःगु दल सत्ताया कासाय् लगेमजुइगु धयादिल ।
वयेकल न्हूगु संविधान च्वयेगु निंतिं राष्ट्रिय सहमति आवश्यक जूगु धयादिसें उकीया निंतिं माओवादीं नं वर्तमान सरकारय् वयेमाःगु धयादिल । वयेकलं माओवादी नाप वर्तमान सरकारय् वयेगुया विकल्प मदुगु नं धयादिल ।
अथेहे वयेकलं पार्टी व सरकारय् प्रतिनिधित्व यानाच्वंपिं दथुइ समन्वय मजूगुलिं समस्या ब्वलंगु धयादिल । उपप्रधानमन्त्री सुजाता कोइराला पाखे लक्षित यानादिसें वयेकलं सरकारय् च्वनाः नेतृत्व हिलेमाःगु खँल्हाइपिनि बारे केन्द्रीय समितिया बैठकय् सहलह जुइगु धयादिल ।
