'जात्राया ध्यबा क्वपाःगु मखु'
थन न्यायेकीगु थीथी जात्रा पर्वयात आवंलि सरकारं बीगु याना वयाच्वंगु खर्च मबीगु धकाः निर्णय याःसां अज्याःगु जात्रा पर्वया लागिं गुथि संस्थान कौशी तोषाखाना आदि थासं नियमित रुपं वनाच्वंगु खर्च धाःसा कटौती मजुइगु खँ धाःगु दु । संस्कृति तथा राज्य पुनस्रंरचना मन्त्रालयया सहसचिव एवं प्रवक्ता जलकृष्ण श्रेष्ठं 'सन्ध्या टाइम्स'लिसे खँ ल्हासें थ्व खँ स्पष्ट यानादीगु खः । मन्त्रालयं थज्याःगु निर्णय याःगु समाचार पिहां वयेवं सर्वसाधारणं गुथि व तोषाखानां वनाच्वंगु ध्यबा समेत रोक जुल धकाः भ्रमवश तायेकाच्वंगु खँ नं वय्कलं कनादिल । अज्याःगु जात्रा पर्वया लागिं वनाच्वंगु दां कटौती मजुइगु खँ वय्कलं स्पष्ट यानादिल ।
सरकारं वास्तवय् थीथी महोत्सव, पर्व, मेला आदिया नामय् बीगु याना वयाच्वंगु ध्यबा जक मबीगु धकाः निर्णय याःगु खँ वय्कलं कनादिल । 'स्वनिगः दुने व पिने अज्याःगु महोत्सवत जुइबलय् थीथी पहुँचया लिधंसाय् सरकारपाखें ध्यबा यंकेगु यानाच्वंगु दु, आवंलिं अज्याःगु ध्यबा जक मबीगु धकाः निर्णय याःगु खः' वय्कलं कनादिल ।
थःगु मन्त्रालयया नां हे संस्कृति मन्त्रालय खः, अज्याःगु मन्त्रालयं झन् संस्कृति हे खत्तम जुइ कथंया छुं नं ज्या मयाइगु खँ नं भाजु श्रेष्ठं स्पष्ट यानादिल ।
