थारूतय्सं थौं झिंछगुलिं समितिया रिपोर्ट च्याकीगु
येँ (सन्ध्या टाइम्स)/थारू कल्याणकारिणी सभां थौं संविधानसभाया थीथी झिंछगू समितितय्सं तयार याःगु प्रतिवेदन लगायत नकतिनि लःल्हाःगु १४ प्रदेशया नक्शा छ्वयेकीगु जूगु दु ।
न्हू बानेश्वरया संविधानसभा भवन न्ह्यःने थौं न्हिनय् ३ बजे उगु प्रतिवेदन व नक्सा छ्वयेकेत्यंगु खः। संविधानसभाया राज्य पुनर्संरचना तथा राज्य शक्ति बाँडफाँड समितिं उगु नक्सा तयार याःगु खःसा मेगु झिगू समितिं झिगू हे प्रतिवेदन तयार याःगु खः ।
राज्य पुनर्संरचना नापं राज्य शक्ति बाँडफाँड समितिं तयार याःगु मस्यौदाय् थरुहट स्वायत्त प्रदेश मदुगुलिं थारू कल्याणकारिणी सभां न्हापांगु चरणया संघर्षया ज्याझ्वः कथं थ्व मि तयेगु ज्या यायेत्यंगु खः। सभापाखें तराई लागायात बहुप्रदेश दयेकेमाः धकाः माग यानाच्वंगु खःसां नक्साय् धाःसा निगू जक प्रदेश दयेकल धासें थ्व विरोध याःगु खः। सभां थःपिनि न्हापांगु चरणया संघर्ष कथं मधेशय् थरुहट स्वायत्त प्रदेश सहित बहुप्रदेश जुइमाःगु, थारूतय्त अग्राधिकार नापं आत्मनिर्णयया अधिकार दयेमाःगु लगायतया माग न्ह्यःने तःगु दु ।
सभाया महामन्त्री राजकुमार लेखीं 'सन्ध्या टाइम्स' लिसे खँ ल्हासें थःपिनि माग पूरा याकेगु निंतिं संविधानसभायात खबरदारी नापं भण्डाफोर अभियान कथं थौंया ज्याझ्वः यायेत्यनागु जानकारी बियादिल ।
वय्कलं न्हापांगु चरण अन्तर्गत माघ २४ गते मसाल जुलुस पिकायेगु, माघ २५ गते थारुहट स्वायत्त प्रदेश बन्द यायेगु जानकारी नं बियादिल। यदि न्हापांगु चरणया आन्दोलनयात नं संविधानसभां वास्ता मयात धाःसा वयां लिपा अझ सशक्त संघर्ष यायेगु खँ नं वय्कलं कनादीगु दु ।
