उपराष्ट्रपतिं हिन्दीं सपथ काइ मखुत
येँ (सन्ध्या टाइम्स)/निष्क्रिय उपराष्ट्रपति परमानन्द झां आः थःगु पद सक्रिय यायेगु लागिं हानं यानादीगु सपथ ग्रहणया भाषा छु जुइ धइगु जिज्ञासा थन ब्वलनाच्वंगु दु। वय्कःलिसे सतीगु सूत्रं धाः कथं वय्कलं आः हिन्दीं भासं धाःसा सपथ मकायेगु खँ धयादीधुंकूगु दु। आः वय्कलं खस वा थःगु हे मांभाय् मैथिलीं सपथ कायेगु बारे बिचाः यानाच्वंगु जानकारी नं सूत्रं बिउगु दु ।
मांभाय् मैथिली जूगुलिं आः वय्कलं मैथिली भासं हे सपथ ग्रहण यायेमाः धकाः मैथिल समाजं आग्रह यानाच्वंगु दु। अज्याःगु आग्रह याः वइपिंत वय्कलं मैथिलीं सपथ कायेगु सम्भावना दु धकाः कना छ्वयेगु यानाच्वंगु दु। वय्कःया सपथ ग्रहण बारे ज्याझ्वः धाःसा दयेकूगु मदुनि।
'नेपालीं सपथ काये हे माः'
कानून मन्त्री प्रेमबहादुर सिंहं अन्तरिम संविधानय् संशोधन जूसां उपराष्ट्रपति झां खस नेपालीं भासं नं सपथ काये हे माः धयादीगु दु। म्हिगः बीबीसीलिसे खँ ल्हासें वय्कलं संविधानय् संशोधन जू कथं आः न्हापां खस भासं सपथ कयाः वयां लिपा चाहे जूसा जक मांभासं सपथ कायेगु खः धयादिल ।
