नागरिक समाज सत्याग्रहपाखे
येँ (सन्ध्या टाइम्स)/क्वःछिना तःगु ई २०६७ या जेठ १४ गतेया दुने हे न्हूगु संविधान घोषणा यायेमाःगु माग यासें न्हूगु वानेश्वरया संविधानसभाया न्ह्यःने न्हिगः न्हिनंनिसें न्हिछि चछि धर्ना च्वंपिं नागरिक आन्दोलनया न्ह्यलुवातय्सं इलय् हे न्हूगु संविधान घोषणा मयात धाःसा सत्याग्रह यायेगु ख्याच्वः बिउगु दु ।
लोकतन्त्र व शान्तिया निंतिं नागरिक आन्दोलनया आह्वान कथं म्हिगः न्हिनय् १ बजेनिसें च्वंगु थ्व २४ घण्टे धर्नाया झ्वलय् आन्दोलनया कजि डा. देवेन्द्रराज पाण्डें आः थःपिं सत्याग्रहपाखे वने मालेफुगु खँ कनादीगु खः ।
धर्नाय् नागरिक आन्दोलनया न्ह्यलुवापिं पद्मरत्न तुलाधर, श्याम श्रेष्ठ, डा. सुन्दरमणि दीक्षित आदि आपालं मनूतय्सं ब्वति काःगु खः। धर्ना थौं न्हिनय् १ बजे क्वचाइ ।
