दलितय् द्यःला नियुक्ति बदर यायेत ज्ञापन
येँ (सन्ध्या टाइम्स)/राष्ट्रिय दलित आयोगय् नेवाः समाज दुनेया द्यःला जातिपाखें नं छम्हेसित दुजःया रुपय् मनोनित याःगु खँयात कयाः द्यःला समाज संघपाखें म्हिगः स्थानीय विकास मन्त्रीयात छगू ज्ञापनपत्र बिल ।
राष्ट्रिय दलित आयोगय् द्यःला समाजपाखें निर्मल द्यःलायात नियुक्त यानाः सरकारं नेवाः देय् दबू नापं द्यःला समाज संघया मर्म विपरित ज्या याःगु खँ ज्ञापनपत्रय् धयातःगु दु। दलित आयोगया दलित धखलय् नेवाः समाजया छुं नं जाति सुचिकृत जुयाच्वंगु मदुगुलिं गैर दलितयात दलित आयोगय् दुथ्याकूगु पाय्छि मजू धासें उगु नियुक्ति बदर यायेत ज्ञापनपत्रय् माग यानातःगु दु। थ्व नियुक्ति प्रति द्यःला समाज व नेवाः देय् दबुलिं आपत्ति क्यंगु दु ।
