'जातीय आधारया राज्यं राष्ट्रियता क्वातुइ'
एकीकृत नेकपा (माओवादी)या सभासद् हिसिला यमीं जातीय राज्यं देय् कुचाः जुइ धइगु तर्क गलत जूगु खँ धयादीगु दु । वयेकलं नेपाः थंज्याःगु बहुजातीय देशय् जातीय आधारया राज्यं राष्ट्रियता अझ क्वातुइगु खँ धयादिल । वयेकलं जातीय आधारय् राज्य विभाजन यायेमाःगु खँय् नं बः बियादिल ।
संविधानसभाया बुधवाःया बैठकय् राज्य पुनर्संरचना व राज्य शक्तिया बाँडफाँड समितिं पेश याःगु प्रारम्भीक मस्यौदा बारे न्ववानादिसें कांग्रेस व एमाले सेनाया निर्देशनय् संघीयताया विरोधय् लगे जुयाच्वंगु द्वपं बियादिल । वयेकलं कांग्रेस व एमालेया एकात्मक बिचाःया कारणं झिंप्यंगू प्रदेशया विरोध यानाच्वंगु नं धयादिल ।
वयेकलं न्हापा बहुदल, संविधानसभा थंज्याःगु खँग्वः तकं न्यने चाहेमजुपिं शक्तित आः संघीय गणतन्त्रया ढाँचा तयार जुइधुंकाः थुकीया विरुद्ध अनेक तर्क तयाच्वंगु प्रति आपत्ति प्वंकादिल । वयेकलं संघीयताया निंतिं समितिं न्ह्यब्वःगु अवधारण स्वीकार यानाः न्ह्याः वनेत दक्वंसित इनाप नं यानादिल ।
अथेहे बैठकय् कांग्रेस सभासद् प्रकाशमान सिंहं समितिया अवधारण अवैज्ञानिक जूगुलिं विज्ञ सहितया उच्चस्तरीय आयोग गठन यानाः प्रदेश निर्धारण यायेमाःगु बिचाः प्वंकादिल । नापं वयेकलं समानुपातिक सिद्धान्तय् दक्वं पार्टीया सहमति जुइधुंकूगुलिं राजनीतिक अग्राधिकार बीम्वाःगु बिचाः प्वंकादिल ।
एमाले सभासद् ल्हारक्यालं कांग्रेस वा माओवादी धाः कथंया अवधारणया ल्यूने जक मवंसें तराईलय् स्वंगू, हिमालय् स्वंगू व पहाडय् न्हय्गू प्रदेश जुइमाःगु बिचाः प्वंकादिल ।
