आयोगया माग संविधान जारी मयायेगु षड्यन्त्र : भट्टराई

एकीकृत नेकपा (माओवादी)या उपध्यक्ष डा. बाबुराम भट्टराईं इलय् हे संविधान जारी याये चाहेमजुपिंसं संविधानसभाया राज्य पुनर्संरचना व राज्य शक्तिया बाँडफाँड समितिया प्रतिवेदनया विरोध यानाच्वंगु द्वपं बियादीगु दु ।

बुधवाः येँय् जूगु छगू ज्याझ्वलय् न्ववानादिसें वयेकलं इलय् हे संविधान जारी यायेमबीगु षड्यन्त्र कथं आः वयाः राज्य पुनर्संरचना आयोगया माग यानाच्वंगु धयादिल । 'थ्व संविधानयात इलय् हे निर्माण यायेमबीगु षड्यन्त्र कथं वःगु माग खः' वयेकलं धयादिल, 'मखुसाः आः वयाः आयोग गठनया माग यायेगुया छुं अर्थ मदु ।'

वयेकलं कांग्रेस व एमालें माग यानाच्वंगु आयोग संविधानसभा स्वयां च्वये जुइमफइगु धयादिसें समितिं पेश याःगु झिंप्यंगू प्रदेशया राज्य पुनर्संरचना वैज्ञानिक जूगु तर सिंमांकनय् धाःसाः पुर्नविचार यायेफइगु धयादिल ।