दकलय् न्हापाः ल्वाभः व्यवस्थापना : पौडेल

नेपाली कांग्रेसया उपसभापति रामचन्द्र पौडेलं सैन्य शक्ति कायम हे तयाः जारी याःगु न्हूगु संविधानया छुं अर्थ मदइगुलिं दकलय् न्हापां ल्वाभः व्यवस्थापन यायेमाःगु खँ धयादीगु दु ।

नेपाः-भारत मानव विकास व मैत्री संघं बुधवाः येँ याःगु अन्तक्रिया ज्याझ्वलय् न्ववानादिसें वयेकलं न्हूगु संविधान निर्माण व शान्ति प्रकृयायात निष्कर्षय् थ्यंकेगु इलय् वइगु अवरोधयात चीकेत उच्चस्तरीय राजनीतिक संयन्त्र गठन जूगु धयादिल । वयेकलं अज्याःगु संयन्त्रं लक्ष्य स्वयां पिने वनाः ज्या यायेमज्यूगु बिचाः प्वंकादिल ।

'वर्तमान सन्दर्भय् नेपाः-भारतया सम्बन्ध' विषयक अन्तक्रिया ज्याझ्वलय् नेता पौडेलं सीमा क्षेत्रय् च्वनाच्वंपिं नेपाःमितय् जनसतरया मैत्री स्वापूयात लिच्वः मलाकेत भारत सरकार नाप इनाप यानादिल ।