संयन्त्र भंग यायेमाः : गच्छदार
उपप्रधानमन्त्री विजयकुमार गच्छदारं उच्चस्तरीय राजनीतिक संयन्त्रया दुजःतय्सं सत्ता परिवर्तन यायेगु षड्यन्त्र यानाच्वंगुलिं संयन्त्र भंग यायेमाःगु खँ धयादीगु दु ।
बुधवाः सुथय् विराटनगर बस पार्कय् जूगु छगू ज्याझ्वलय् पत्रकारत नाप खँल्हाबंला यानादिसें वयेकलं संयन्त्रया उदेश्य राजनीतिक गतिरोध अन्त्य यायेगु व सरकार व दलत दथुइया स्वापू कायम यायेगु जुसां संयन्त्रया दुजःत राजनीतिक समिकरण व सरकार हिलेगु कासाय् लगेजुयाच्वंगु द्वपं बियादिल । वयेकलं संयन्त्रया उदेश्य अनुरुप ज्या मजूगुलिं उकीयात भंग यायेमाः धयादिल ।
वयेकलं संयन्त्रय् स्वंगू दलया नेतात जक दुथ्याकाः षड्यन्त्र यानाच्वंगु धयादिसें तःधंगु दलया नेता सत्तया कासाय् जक तक्यनाच्वंगु द्वपं बियादिल । वयेकलं थःत सत्ताय् च्वनाच्वनेगु स्वार्थ मदुगु धयादिसें इलय् हे संविधान निर्माण यायेत थः लगेजुइगु धयादिल ।
वयेकलं इलय् हे संविधान निर्माण मजुसां देशय् जटिल अवस्था ब्वलनीगुलिं अज्याःगु परिस्थिति ब्वंकेमबीत दक्वं दलत सत्ताया स्वार्थ स्वयां थहांवनाः संविधान निर्माण यायेगु ज्याय् गम्भीर जुइमाःगु धयादिल ।
