'अझ न्यादँ तक लोडसेडिङ जुइ'
ऊर्जा मन्त्रालयं देशय् अझ न्यादँ तक लोडसेडिङ जुइगु खँ धाःगु दु । बुधवाः ऊर्जा मन्त्रालयलय् पत्रकार सम्मेलन याना: ऊर्जा मन्त्री प्रकाशशरण महतं सन् २०१५ तक च्वयेया तामाकोसी लगायत मेगू आयोजना निर्माण जुइधुंकाः तिनि देय् दुने उत्पादन जुइगु जलविद्युत पाखें लोडसेडिङ पूर्ण रुपं बन्द जुइगु खँ कनादिल । वयेकलं सन् २०१२ तक थप २३३ मेगावाट विजुली उत्पादन जुइगु व भारत प्रसारण लाइन सम्पन्न जुइधुंकाः लोडसेडिङ म्हो जुयावनीगु धयादिल ।
अथेहे वयेकलं परियोजना संचालनया लाइसेन्स काइगु तर निर्माण मयाइगु संस्थाया लाइसेन्स पत्र रद्ध यायेगु प्रक्रिया सुरु जूगु जानकारी बियादिल । सर्वेक्षण अनुमति पत्र प्राप्त यानाः निर्धारित इलय् सन्तोषजनक प्रगति मयाःगु न्हय्गू अनुमति पत्र व छगू विद्युत उत्पादन अनुमति पत्र खारेज जूगु नं धयादिल ।
ऊर्जा मन्त्री महतं थ्व दँय् भारत पाखें १३० मेगावाट विद्युत आयात जुइधुंकूगुलिं थ्व दँय् न्हि झिनिघौ स्वयां अप्व लोडसेडिङ मजुइगु दाबी यानादिल । पत्रकार सम्मेलनय् वयेकलं लोडसेडिङ अप्वयेके मबीगु कार्ययोजना नं सार्वजनिक यानादिल ।
