प्रदेशया सिमांकनया बारे जनमत संग्रह यायेफइ : भट्टराई
एकीकृत नेकपा (माओवादी)या उपाध्यक्ष डा. बाबुराम भट्टराईं राज्य पुनर्संरचना समितिं प्रस्ताव याःगु झिंप्यंगू प्रदेशया सिमांकनय् सहमति मजुसाः जनमत संग्रह यायेफइगु खँ धयादीगु दु ।
संविधानभासया बैठकय् राज्य पुनर्संरचना व राज्य शक्तिया बाँडफाँड समितिया प्रारम्भीक मस्यौदाय् जुयाच्वंगु सहलहलय् मंगलवाः न्ववानादिसें नेता भट्टराईं प्रस्ताविन झिप्यंगू प्रदेशया सिमांकनय् सहमति मजुसाः जनमत संग्रह पाखें सिमा क्वछीफइगु खँ धयादीगु दु । वयेकलं वस्तुगत रुपं झिंप्यंगू प्रदेशया खाका पाय्छि जूगु धयादिसें सिमांकन छुं भचा मिले मजूगु व उकीया बारे सहलह यानाः सहमति मजुसाः जनमत संग्रहलय् वनेफइगु धयादिल ।
वयेकलं लोकतन्त्रयात क्वतुकेत छुं इया निंतिं राजनीतिक अग्राधिकार बीमाःगु धयादिल । वयेकलं कमजोर व बल्लागु शक्ति दथुइ प्रतिस्प्रर्धा जुइमफइगु धयादिसें लोकतन्त्रयात बल्लाकेत निगूलिं पक्षयात समान दयेकेत छुं ईया निंतिं राजनीतिक अग्राधिकार बीमाःगु बिचाः प्वंकादिल ।
अथेहे वयेकलं छुं प्रदेशत आर्थिक रुपं सवल मजूगुलिं अज्याःगु प्रदेशय् पूर्वाधारया विकास यायेफइगु धयादिल । वयेकलं समान भौगोलिक व सांस्कृतिक एकरुपता जूगु क्षेत्रयात छगू प्रदेश दयेकेवं उकीयात जातीयता जक धायेकफइगु धयादिल ।
