'माओवादी स्वीकार यायेफइ तर कांग्रेस यायेफइमखु'
उपप्रधानमन्त्री विजयकुमार गच्छदारं एनेकपा (माओवादी) नेतृत्वया सरकार स्वीकार यायेफइगु तर कांग्रेसया सरकारयात माने यायेमफइगु खँ धयादीगु दु । मोरङ मोतिपुर गाविस भवनया उल्लेज्या यानादिसें वयेकलं कांग्रेसया कारणं हे देशं क्षति भोगे यायेमाःगु धयादिल, 'बरु माओवादी नेतृत्वय् वये चाहे जुसाः फ्वनेमाल जिमिसं बी ।'
वयेकलं देय्यात शारीरिक व मानसिक रुपं स्वस्थ्य प्रधानमन्त्रीया आवश्यकता दुगु धयादिसें गिरिजाप्रसाद कोइरालाया नेतृत्वया सरकार स्वीकार यायेमफइगु धयादिल । वयेकलं माओवादी अध्यक्ष पुष्पकमल दाहाल 'प्रचण्ड' व कोइराला दथुइ नं कांग्रेस नेतृत्वया सरकार गठन यायेगु गोप्य सम्झौता जूगु दाबी यानादिसें कांग्रेस नेतृत्वया सरकार गठन जुसाः पीच्यघौ दुने सत्ता परिवर्तन यानाः क्यनाः बीगु ख्याच्वः बियादिल ।
सोमवाः जूगु उच्चस्तरीय राजनीतिक संयन्त्रया बैठकय् माओवादीं कांग्रेसयात सत्ता परिवर्तनया प्रस्तवा याःगु कन्हय् कुन्हु उपप्रधानमन्त्री गच्छदारं उच्चस्तरीय राजनीतिक संयन्त्रया ज्या सत्ता परिवर्तन यायेगु मखु धकाः टिप्पणी यानादिल । राजनीतिक संयन्त्र पार्टीत दथुइया एकता कायम यायेत, शान्ति प्रकृया न्ह्याकेत, राजनीतिक गतिरोध चीकेगु निंतिं गठन जूगु स्पष्ट यानादिसें वयेकलं तर दलया नेतातय्सं थःगु कार्यधिकार स्वयां पिहांवनाः सत्ता परिवर्तनया षड्यन्त्र यानाच्वंगु द्वपं बियादिल ।
