संयन्त्रय् मिसाः दुजः नं दुथ्याकेमाः : कोइराला
उपप्रधानमन्त्री नापं परराष्ट्रमन्त्री सुजाता कोइरालां उच्चस्तरीय राजनीतिक संयन्त्रय् मिसाः प्रतिनिधि नं दुथ्याकेमाःगु माग यानादीगु दु ।
शान्ति व पुनःनिर्माण मन्त्रालयं मंगलवाः येँ याःगु छगू ज्याझ्वलय् न्ववानादिसें वयेकलं शान्ति प्रकयालय् मिसाः प्रतिनिधितय् ब्वति तसकं म्हो जक जूगुलिं उच्चस्तरीय राजनीतिक संयन्त्रय् मिसाःया ब्वति नं आवश्यक जूगु धयादिल । वयेकलं थुकीया निंतिं लविङ यायेत मिसाः सभासदतय्त इनाप नं यानादिल ।
संयुक्त राष्ट्र संघ सुरक्षा परिषदया प्रसताव १३२५ व १८२० सम्बन्धय् सभासद्त नापया अर्न्तक्रिया ज्याझ्वलय् वयेकलं १३२५ व १८२० प्रस्ताव निगूलिं कार्यान्वनया निंतिं नेपाः सरकार पाखें गठित उच्चस्तरीय निर्देशक समितिं कार्ययोजना दयेकेगु ज्याय् लगे जुयाच्वनाःगु कनादिल । उगु समितिया अध्यक्ष नं जुयादीम्ह उपप्रधानमन्त्री कोइरालां उच्चस्तरीय राजनीतिक संयन्त्रय् मिसाःया ब्वति जूसाः अज्याःगु प्रस्ताव कार्यान्वयन यायेत अपुइगु बिचाः प्वंकादिल ।
संयुक्त राष्ट्र संघ सुरक्षा परिषदपाखें पारित १३२५ प्रस्ताव द्वन्द्व लिपाः शान्ति प्रकृयाय् मिसतय् सहभागिता व मस्तय् सहभागिता व संलग्नता सम्बन्धय् दुसाः १८२० प्रस्तावय् मिसाः अधिकार स्थापित यासें हिंसा अन्त्य यायेगु सम्बन्धय् दु ।
