'नेतात वँय् जूसा जक आयोगं ज्या न्ह्याकी'
येँ (सन्ध्या टाइम्स)/संविधानसभाया राज्य पुनर्संरचना नापं राज्य शक्ति बाँडफाँड समितिया सभापति नापं एनेकपा (माओवादी) स्थायी समितिया दुजः लोकेन्द्र बिष्ट मगरं धयादीगु दु - यदि आः वयाः नेतातय्सं राज्य पुनर्संरचना आयोगं हे फुक्क ज्या यायेमाः धाल धाःसा व धाःपिं फुक्कं नेतात वँय् जुल धकाः थुइकूसां जिल ।
राज्य पुनर्संरचना समितिया सछि व नीन्हय्कः तक मुँज्या च्वनाः वैज्ञानिक कथं राज्य पुनर्संरचनाया मस्यौदा प्रतिवेदन तयार यानागु खः धासें आः उगु समितिं तयार याःगु मस्यौदायात कयाः आयोगं प्राविधिक रुपं जक भिंकेगु ज्या याये फइ धकाः नं धयादीगु दु। 'सन्ध्या टाइम्स' लिसे खँ ल्हायेगु झ्वलय् वय्कलं न्हापा हे आयोगयात ज्या याकेमाःगु खः तर आः वयाः आयोगं ज्या यायेमाः धायेगु धइगु तसकं लिउने लायेधुंकूगु खँ खः धासें यदि आयोग दयेकल हे धाःसां वं सैद्धान्तिक खँ त्वःताः प्राविधिक खँ जक स्वःसा बांलाइगु बिचाः नं प्वंकादिल ।
संविधान हे निर्माण मजुइमा धकाः सनाच्वंपिंसं आः वयाः हाकनं राज्य पुनर्संरचना आयोगं ज्या यायेमाः धकाः धयाहःगु दावी यासें वय्कलं यदि अथे जुल धाःसा देशय् तःधंगु ल्वापु जुइगु ख्याच्वः नं बियादिल। थौंकन्हय् राज्य पुनर्संरचना नापं राज्य शक्ति बाँडफाँड समितिं तयार याःगु मस्यौदायात कयाः संविधानसभाय् सहलह जुयाच्वंगु दु ।
