जिं छुं हे मसिउ: आयोग प्रमुख
येँ (सन्ध्या टाइम्स)/तत्कालिन एनेकपा (माओवादी) या नेतृत्वय् दुगु सरकारं राज्य पुनर्संरचनाया निंतिं दयेकूगु राज्य पुनर्संरचना आयोगया कजि गणेशमान गुरुङं नेतातय्सं छु छु यात व खँ थम्हं छुं हे मसिउ धयादीगु दु। वंगु गुला ति न्ह्यः गठन याःगु उगु आयोगया कार्यविधि तकं आः तक मदयेकूनि धासें वय्कलं आः आयोगयात सक्रिय यायेगु खँ गुकथं वयाच्वन उकिया बारे थम्हं छुं हे मसिउ धयादिल। विदेश भ्रमणय् झायेत्यंम्ह वय्कलं म्हिगः 'सन्ध्या टाइम्स'लिसे खँ ल्हासें थः विदेशं लिहां वयेधुंका जक आयोग बारे थप खँ ल्हाये धयादिल। लुमंकेबहः जू तत्कालिन माओवादी सरकारं गुरुङया नेतृत्वय् स्वम्हेसिया राज्य पुनर्संरचना आयोग दयेकूगु खःसां आः तक थुकिया बैठक तकं मच्वंनि ।
